2022 оны ДАШТ, 2023 оны Азийн АШТ-ий урьдчилсан шатны “F” хэсгийн тоглолтууд өчигдөр болж өндөрлөлөө. Японы баг Киргизийг 5:1, Тажикстан Мьянмарыг 4:0 ялсан юм.
Мьянмарын баг гоолгүй ялагдсанаар Монголын шигшээ баг F хэсгийг дөрөвдүгээр байр эзэлсэн амжилтаар дуусгалаа.
ДАШТ-ий хоёр дахь урьдчилсан шатанд анх удаа орж түүх бүтээсэн залуус маань энэ амжилтаа бататгаж хэсгийнхаа 4-р байрт орсноор дараагийн ДАШТ-ий урьдчилсан шатны хэсэгт шууд оролцох эрхтэй болж байна.
Мөн Азийн АШТ-ий гурав дахь урьдчилсан шатны эрхийн төлөө “Плэй офф”-ын хоёр тоглолт хийлгүйгээр дараагийн шатанд тоглох эрх бүрдэж байна. Удахгүй найман хэсгийн дөрөвдүгээр байрт орсон багуудыг эрэмбэлж Азийн АШТ-ий гурав дахь урьдчилсан шатанд ямар улсын багууд тоглох нь тодорхой болно.
